SMZ na SMT, zimeandaa mpango wa kuongeza vituo vya uchunguzi na matibabu ya saratani kwa kutumia teknolojia ya nyuklia wenye thamani ya Euro milioni 59

RAIS wa Jamhuri ya Muungano wa Tanzania, Dk. Samia Suluhu Hassan amesema Serikali za SMZ na SMT, zimeandaa mpango wa kuongeza vituo vya uchunguzi na matibabu ya saratani kwa kutumia teknolojia ya nyuklia wenye thamani ya Euro milioni 59.Amesema, kupitia mpango huo, Serikali hizo zimedhamiria kuviongezea uwezo vituo vya Ocean Road, Dar es Salaam, Bugando, Mwanza na kuanzisha vituo vipya vinne kwa hospitali za Benjamini Mkapa Dodoma, KCMC Moshi, Mnazi Mmoja Zanzibar na Hospitali ya Rufaa Mbeya.

Rais wa Zanzibar na Mwenyekiti wa Baraza la Mapinduzi, Dk. Hussein Ali Mwinyi ameyasema hayo kwa niaba ya Rais wa Jamhuri ya Muungano wa Tanzania, Dk. Samia Suluhu Hassan, alipofungua Ofisi na Maabara ya Tume ya Nguvu za Atomu Tanzania (TAEC) kwa Zanzibar, huko Dunga Zuze, Wilaya ya Kati, Mkoa wa Kusini Unguja.Amesema, kukamilika kwa mpango huo kutaongeza huduma za matibabu ya saratani kwa kutumia teknolojia ya nyuklia na Tanzania itakuwa na vituo sita vya Serikali katika kanda zote muhimu nchini.

Aidha, Rais Dk. Mwinyi ameeleza ujenzi wa Ofisi na Maabara hiyo ni chachu ya kuanza kwa ujenzi wa banki kwa ajili ya kuwekea vifaa vya nyuklia kwa hospitali za Benjamini Mkapa Dodoma na KCMC Moshi.Amebainisha kuwa teknolojia ya nyuklia inaweza kutumika katika uzalishaji wa nishati safi ya umeme na kuwa chaguo la kuvutia kupunguza athari za mabadiliko ya tabia nchi hasa kwa maeneo yenye mahitaji makubwa ya umeme na yenye uwezo mdogo wa kutumia vyanzo vingine vya nishati mbadala.

Ameeleza kwa mendeleo ya kiteknolojia ya nishati ya nyuklia pia yana uwezo wa kuchukua nafasi muhimu katika mchakato wa kuhama kuelekea mfumo wa nishati usio na kaboni (Carbon) au hewa ukaa yanayoweza kuzalisha umeme unaohitajika. Akizungumzia juu ya kupunguza athari za mazingira zinazohusiana na uzalishaji wa umeme unaotegemea vyanzo vyenye mchango mkubwa wa hewa hatari ya kaboni, Rais Dk. Mwinyi amesema ni jambo la faraja kuona Tanzania imejaaliwa kuwa na utajiri wa madini ya urani (uranium), ambayo ndio yanayotumika kuzalisha umeme wa nyuklia.

Hata hivyo, Dk. Mwinyi amezisisitiza Wizara ya Elimu, Sayansi na Teknolojia kushirikiana pamoja na Wizara ya Nishati na wadau wengine kuandaa mpango thabiti ili kuhakikisha Tanzania inaanza kunufaika na umeme wa nyuklia.Amesema lengo la ufunguzi wa ofisi hizo nchini ni kuongeza usimamiaji na uendelezaji wa matumizi salama ya teknolojia ya nyuklia kwa wananchi.

Dk. Mwinyi ameeleza ujenzi wa miundombinu ya ofisi za (TAEC) nchini itaimarisha uthibiti wa matumizi salama ya teknolojia ya nyuklia, sambamba na kuimarisha utafiti, ubunifu na matumizi ya sayansi na teknolojia ya nyuklia katika sekta mbalimbali za maendeleo.Pia Dk. Mwinyi ameishukuru Serikali ya Jamhuri ya Muungano wa Tanzania kwa ujenzi wa Ofisi hiyo kwa Zanzibar pamoja na Kuishukuru Serikali ya Mapinduzi Zanzibar kwa kutoa ushirikiano hasa kwa kutoa eneo la ujenzi wa ofisi hiyo, na kuweka miundombinu wezeshi ikiwemo barabara, umeme na maji.

Katika hatua nyengine Rais Dk. Mwinyi ameeleza sehemu kubwa ya matumizi ya teknolojia ya nyuklia yapo sekta ya Afya hususan kwenye uchunguzi na matibabu ya saratani, kwa vituo vya Ocean Road (ORCI), Hospitali ya Aga Khan, Kituo cha Tiba cha Bugando, Hospitali ya Besta na Hospitali ya Good Samaritan ni wanufaika wakubwa wa teknolojia hiyo.Hata hivyo, Rais Dk. Mwinyi ameipongeza (TAEC) kwa kukamilisha mradi wa Maabara Kubwa (Maabara changamano ya Sayansi na Teknolojia ya Nyuklia) awamu ya pili jijini Arusha na kuongeza kuwa maabara hiyo itaongoza kwa Ukubwa kwa ukanda mzima wa Afrika Mashariki na Afrika kwa ujumla.

Naibu Waziri wa Elimu Sayansi na Teknolojia, Omar Juma Kipanga amesema, Wizara inaendeleza kuwekeza kwenye miundombinu na vifaa vya kisasa vya teknolojia ya Nyuklia, kwa lengo la kuimarisha matumizi na usimamizi sahihi wa mifumo ya nyuklia kwa maendeleo endelevu ya nchi na ustawi wa jamii.Aidha, amesema Wizara inaendelea na mpango wa kuzalisha wataalamu kupitia mpango wa “Samia scholarship Extended” unaotoa fursa zaidi kwa vijana wa Tanzania kila mwaka kusoma katika vyuo bora duniani kwa masuala ya Nyuklia.

Amesema (TAEC) kwa kushirikiana na taasisi ya Nelson Mandela ya Arusha, wameandaa shahada ya juu ya Elimu ya nyuklia katika dhamira ya kuziba pengo la uhaba wa wataalamu nchini ambapo hadi sasa nchi nzima wapo wataalamu tisa tu, aidha, kwa kushirikiana na Chuo Cha Ufundi Arusha wameandaa mafunzo ya ngazi ya Stashahada za fani hiyo, lengo ni kuona mchango wa masuala ya nyuklia ni mkubwa katika kuimarisha uchumi na maendeleo ya nchi.

Naye, Waziri wa Afya wa Zanzibar, Ahmed Nassor Mazrui amesema ujenzi wa ofisi na maabara hiyo hapa nchini, unaakisi dhamira ya Serikali ya Mapinduzi ya Zanzibar ya kujenga hospitali za Rufaa za Binguni na Mnazi Mmoja zitakazokuwa na matumizi makubwa ya mionzi hasa kwa Mashine za MRI, X - Ray na City Scan na kuihakikishaia (TAEC) kufabya kazi bega kwa bega Serikali katika kuyafikia malengo yao hasa kwa sekta ya Afya.

Amesema (TAEC) itakuwa msimamizi na mshauri mzuri wa masuala ya Atomu kwa wafanyakazi wa Zanzibar kuwajengea uwezo, kupata umahiri na uweledi katika matumizi ya Nyuklia.